التأمل اليومي – الخميس 11-2-2010
الموضوع: معنى إسم يسوع

في تأملنا من انجيل لوقا، بغينا نتأملوا اليوم في الأسم يسوع. واش كتذكر عزيزي المستمع اش قال ملاك الله جبرائيل لمريم العذراء حين جاء عندها وبشرها بأنها غادية تحمل بقدرة الله، حين ينزل عليها روح الله القدوس؟ خلينا نرجعوا الآن الى الفصل الأول من انجيل لوقا ونقراوا ما يلي: ” قال ليها الملاك، ما تخافيش يا مريم، راك مرضية عند الله، وراك غادية تحملي،وتولدي ولد وتسميه يسوع” ( لوقا 1: 30 – 31). اشكون هو يسوع؟ طبعا هو المسيح ابن مريم العذراء. وحين نقراوا كتب العهد الجديد كلها كنوجدوا اسم يسوع في الغالب كيجي مرتبط  مع اسم المسيح. وعلى داك كنقولوا يسوع المسيح. ولا بد من الملاحظة ان الأسم يسوع، ما هو شي من اختراع مريم او يوسف خطيب مريم. هذا الأسم جاء مباشرة من عند الله بواسطة جبرائيل اللي قال ليها: “راك غادية تحملي، وتولدي ولد وتسميه يسوع. واذا إنتقلنا الى انجيل متى نشوفوا جبرئيل يبشر يوسف خطيب مريم بنفس الطريقة. اسمع اش يقول حين ظهر ملاك الله جبرائيل ليوسف، قال ليه: “آ يُوسُفُ بْنَ دَاوُدَ! ما تخافش تاخد خطيبتك مريم لدارك، لأن اللي هي حاملة به، راه مِنَ الرُّوحِ الْقُدُسِ، وراها غادية تولد ولد، وانت غادي تمسيه يَسُوعَ، لأَنَّهُ هُوَ الَّلي غادي يُخَلِّصُ شَعْبَهُ وينجيهم مِنْ ذنوبهم وخَطَايَاهُمْ” (متى 1: 20 – 21).

هنا عزيزي المستمع نشوفوا ملاك الله جبرائيل هو اللي اطلق اسم يسوع على المسيح. وفي نفس الوقت اعطانا المعنى ديال يسوع. اشنو المعنى ديال يسوع؟ خلينا نرجعوا مرة اخرى لكلام الملاك. اسمع آش قال ليوسف على مريم: ” را مريم غادية تولد ولد، وانت غادي تمسيه يَسُوعَ، لأَنَّهُ هُوَ الَّلي غادي يُخَلِّصُ شَعْبَهُ وينجيهم مِنْ ذنوبهم وخَطَايَاهُمْ”. واش لاحظت آش قال؟ يسوع هو اللي غادي يخلص أو ينجي شعبه من خطاياهم. ندركوا من هذا ان اسم يسوع يعني مخلص اي منجي اللي غادي ينجي شعبه، مع العلم ان شعبه هنا ماشي الشعب السياسي، لكن شعبه هو المومنين، اللي غادي يآمنوا به.

يسوع المسيح عزيزي المستمع عنده اسماء والقاب كثيره (اكثر من 40 لقب). واحنا من الآن غادي نبداوا نستعملوا اسم يسوع او يسوع المسيح في تأملاتنا القادمة. اذا رجعنا تاريخيا  للقرن الأول والثاني، نكتشفوا كيف كانوا المسيحيين مضطهدين من اليهود والرومان. وفي داك الوقت بداوا يستعملوا رسم السمكة كشعار أو علامة باش يتعرفوا على بعضهم. وكلمة سمكة في اللغة اليونانية مركبة من 5 الحروف. وكان كل حرف كيشير الى كلمة. والكلمات الخمسة كيكونوا الجملة الثالية اللي تقول: “يسوع المسيح ابن الله مخلص”. وإسم يسوع في العبرية هو يشوع اللي كان مشهور من وقت موسى، وكان كيعني الله مخلص، اي منجي. والمسيح تسمى بهذا الأسم بأمر من الله، حيث قال الملاك: ” وتسميه يسوع لأنه هو اللي يخلص وينجي شعبه من خطاياهم”.

الأنجيل كيبخرنا بكل صراحة، ان الناس كلهم ورثوا الخطية من آدم وارتكبوا الذنوب. ونقراوا ما يلي: “ما كاين حتى فرق، لأن الناس كلهم ارتكبوا الذنب وما قدروش يوصلوا لمجد الله (رومية 3: 22 – 23). هذا يعني اننا كلنا خطاة، وكلنا تحت العقاب والدينوة امام الله. على داك الشي كنقروا ما يلي: “ألأجرة ديال الذنب والخطية هي الموت، ولكن العطية ديال الله هي الحياة الأَبَدِيَّةُ بواسطة يسوع الْمَسِيحِ” (رومية 6:23). نفهموا من هذا ان العقاب هو الموت الأبدي في نار جهنم، هما الأجرة اللي يستحقها الخاطي المذنب. ولكن كاين الرجاء، كاين الأمل، حيث هبة الله او عطية الله هي الحياة الأبدية في الفردوس مع يسوع المسيح.

الأسم يسوع يعني مخلص، ويسوع المسيح هو بالفعل المخلص اللي ارسله الله باعجوبة باش هو يتحمل العقاب، ويموت عوض المذنبين، ويتصلب في بلاصت الخطاة. على داك الشي كنقراوا ما يلي: “الله حب ناس العالم، وسبل ابنه الوحيد، باش كل من يآمن به ما يتهلكش، لكن ينال الحياة الأبدية” (يوحنا 3: 16).  يعني الحياة الدايمة اللي ما عندها نهاية مع الله. وكنقراوا أيضا ما يلي: “الله بين المحبة دياله لينا، لأنه ولو احنا مذنبين مات المسيح في مكانا” (رومية 5: 8).

نلخصوا تأمل اليوم اللي دار على أسم يسوع هكذأ. الله هو اللي سمى المسيح ابن مريم بيسوع بواسطة ملاكه جبرائيل. واسم يسوع يعني مخلص. والله ارسل يسوع باش يكون فدية لجميع الناس، حيث مات باش كل من يآمن به ينجى ويخلص من عقاب الذنب. وانت عزيزي المستمع، واش حصلت على الخلاص؟ واش ضمنت الحياة الأبدية؟ واش كتآمن بيسوع المخلص. غادي نتركك مع هذه الأسئلة، وبها نختموا تأمل اليوم اللي دار على معنى يسوع. الى اللقاء.