التأمل اليومي – الأحد 25-4-2010
الموضوع: الإيمان

اليوم عزيزي المستمع غادين نقراوا من الفصل 9 ديال انجيل لوقا، من الأية 37 حتى الآية 43. كنقراوا في هذه الأيات ما يلي: “. وحين نزل يسوع هو تلاميذه من الجليل، تلقاوا ليه ناس كثار، وغوت واحد منهم وقال: “أ سيدي، بغيتك تشوف من حال ولدي، ما عندي غيره. حيث كيغفله واحد الجن وكيبدأ يغوت، وكيصرعه حى تخرج الكشكوشة من فمه. وما كيطلقه حتى يعييه ويكرفصه. ورغبت التلاميذ ديالك باش يخرجوه منه ولكن ما قدروش”. وجاوب يسوع وقال: “راكم جيل فاسد وما عندكم ايمان، حتى إيمتا غادي نبقى معكم ونصبر ليكم؟ وقال للرجل: “قرب ولدك هنا”. ومنين كان الولد كيقرب لعند يسوع، صرعه الجن وخبطه مع الأرض. ونهض يسوع في الجن وخرجوا من الولد، وشفى الدري ورجعه لباه. وتعجبوا الناس اللي كانوا حاضرين كلهم من عظمة الله وقوته”؟ (9: 37 – 42).

هذه عزيزي المستمع راها معجزة اخرى من معجزات المسيح الخارقة للطبيعة. كل مرة عمل فيها يسوع شي معجزة، كان كيشيد باللي طلب الشفاء ويقول ليه ايمانك شفاك. المسيح بغى الناس اللي شافوا شي معجزة يعرفوا انها صارت حيث الأنسان طلب الشفاء آمن باين يسوع قادر يشفيه. ولكن هذه المرة كنشوفوا المسيح بحال الا غضبان شوية من قلة الأيمان. على داك الشي قال: “راكم جيل فاسد وما عندكم ايمان، حتى إيمتا غادي نبقى معكم ونصبر ليكم؟ ومن حيث الأيمان مهم في الحياة الروحية. بغيت نتكلم شوي على الأيمان في هذا التأمل. كنقراوا في الآنجيل ما يلي: “الإِيمَان، َهُوَ الثِّقَةُ باين الامور اللي كنترجوها غادية تتحقق. الايمان هو الاقتناع بأن الامور اللي ما كنشوفوهاش راها بالفعل موجودة”. نعم، الأيمان ما هواش امر محسوس وما نقدروش نشوفوه. على داك الشي قرينا باين الأيمان راه هو الثقة. والثقة راها هي الخطوة الاولى للنجاح. والايمان راه هو الاقتناع بأن بعض الامور راها موجودة ولو ما كنشوفوهاش، مثل الثيار الكهربائي اللي كيدوز في السلك بلا ما يتشاف. ولكن كنشوفوا تأثيره في بولات الضوء وفي الآلات اللي كنستخدموا كل نهار في ديارنا. ألأيمان ما كيتشافش، بحال الريح، ما كيتشافش ولكننا كنحسوا به، وكنشوفوا تأثيره حين يزعزع الشجر او يطير الغبار والتراب في الهواء. هذه الأمور وخى ما كنشوفوهاش، كنآمنوا وكنثيقوا بأنها موجودة. وهكذا الأيمان، فهو الثقة الكاملة في الأمور اللي كنترجاوا نحققوها. الايمان هو الأقتناع بالأمور اللي ما كتتشافش.

الايمان عزيزي المستمع راه امر اساسي في الكتاب المقدس. واذا رجعنا لبعض الفصول والفقرات في الانجيل، يمكن لينا نشوفوا نتائج الإيمان، ويمكن لينا نشوفوا كيف يستجيب الله لكل من يوضع ثيقته فيه. مع العلم، أن اهمية الايمان هي فيمن كنوضعوا ثقتنا؟ كاين اللي كيثيق غير في ذاته ونفسه، وكاين اللي كيثيق في شخص آخر، والنتيجة هي الفشل وخيبة الامل. على داك الشي خصنا نوضعوا ثقتنا في الله وحده، فهو اللي يعمل فوق ما نتصوروا.

واش كتعرف عزيزي المستمع باين ما يمكن شي لينا نفرقوا بين الايمان في حياتنا العادية وحياتنا الروحية؟، واش كتعرف الفرق بين الايمان في الحياة العادية والايمان في الحياة الروحية؟. الفرق راه موجود في اهدافنا، لأنه حين نوضعوا ثقتنا في الله. داك الوقت يمكن لينا نشوفوا الامور كما يشوفها الله.

الأيمان راه مهم في حياتنا. ويمكن لينا نشوفوا اهميته في حياة المسيح. على داك الشي كان يقول لكل شخص يطلب يشفى، كان يقول ليه: “ايمانك شفاك”. واش كتذكر اش قال لهديك المرأة اللي كانت كتنزف بالدم 12؟ قال ليها: “إيمانك شفاك ا بنتي، سيري مع السلامة”. وقال لواحد آخر: ” اذا كنت تآمن وما تشك شي، كل ما تطلب يكون ليك”. من هذه الايات وكثير غيرها يمكن لينا عزيزي المستمع ندركوا باين الايمان راه هو اللي كيحول آمالنا الى حقائق واقعية. فالخلاص بالايمان، والصلاة بالايمان، والانتصار بالايمان. كل ما كنعملوه خص يكون بالثقة والايمان.

وختام الكلام عزيزي المستمع، هو نقتنعوا باين الاشياء اللي كنتوقعوا، غادية تصير بالفعل. لأن الايمان راه هو الخطوة الاولى او هو نقطة البداية للحصول على ما نترجاوا ونتمناوا. وعدم الثقة أو عدم الأيمان ما ينتجوا غير الفشل وخيبة الامل. اما الثقة القوية والنية الشديدة وألأيمان الصادق، هما اللي كيجيبوا نتائج عظيمة، نتائج توصل المومن الى التقدم في العمل، والتحسن في العلاقات مع الناس. ما بقى ليا غير نودعك الآن عزيزي المستمع على امل اللقاء بك غدا انشاء الله في تأمل جديد من انجيل لوقا. دمت في رعاية الأمين. الى اللقاء.