التأمل اليومي – الخميس 6-5-2010
الموضوع: اليوم العالمي للصلاة

فرحان نتلاقا بيك عزيزي المستمع في تأمل جديد في هذا اليوم الخاص بالصلاة. المسيحيين في العالم اليوم واتباع المسيح الحقاق خصصوا هذا النهار باش يصليوا من اجل العالم ومن اجل سكان العالم ومن اجل قادة العالم، كيصليوا اليوم من اجل السلام والصحة ومن اجل نشر كلمة المسيح الحية المقدسة. على داك الشي حتى احنا بغينا نخصصوا هذا التأمل للكلام على الصلاة. وغادين نرجعوا للفصل 6 ديال انجيل لوقا باش نقراوا على المسيح ما يلي: “وفي ديك الأيام طلع يسوع للجبل باش يصلي، وبقى الليلة كلها كيصلي لله. وفي الصباح بكري، عيط على تلاميذه واختار منهم 12 وسماهم رسل” (لوقا 6: 12 – 13). هنا عزيزي المستمع نشوفوا المسيح يقضي الليلة كلها في علاقة مع الله بواسطة الصلاة.

وحيث الصلاة راها مهمة، شجع المسيح تلاميذه على الصلاة، وقال ليهم حين طلبوا منه يعلمهم يصليوا. قال ليهم: “صليوا انتما هكذا وقولوا. يا بونا، ياللي في السما. يتقدس اسمك، ويجي ملكك، ويكون خاطرك ومرادك في الأرض كما هو في السما. اعطينا الخبز اللي يكفينا اليوم، وغفر لينا ذنوبنا، بحال ما كنغفروا احنا لــللي كيذنبوا لينا. نجينا من الشيطان، وما تدخلناش في التجارب، لأن الملك والقوة والمجد راهم ديالك من الآن والى ابد الأبدين”. آمِين”.

(متى 6: 9 – 13). هذه الصلاة اللي علم يسوع لتلاميذه راها غير نمودج ومثال فقط، لأن الصلاة المسيحية كتنبع من القلب، كتنبع حسب الظروف الراهنة، على داك الشي ما كاين حتى صلاة اللي خصنا نحفظوها ونبقاوا نعاودوها بطريقة روتينية. لأن الظروف والأسباب كتتغير. والأحتياجات كتتغير، وكلام صلاتنا ومخاطبتنا لله حتى هو كتتغير حسب الوقت اللي احنا فيه.

المسيح عزيزي المستمع بدأ يوصي تلاميذه على نوعية الصلاة المقبولة وقارنها بصلاة المنافقين وقال: “وانتما حين تصليوا، ما تكونوش بحال المنافقين اللي كيحبوا يصليوا واقفين في الأماكن العامة، وفي قنات الزناقي باش يشوفوهم الناس. هادوك راهم نالوا الأجر ديالهم من الناس. ولكن انت حين تصلي، ادخل لبيتك، (ادخل لغرفتك)، وسد الباب وراك، وصلي لله بلا ما يشوفك حتى واحد. والله اللي كيشوف في الخفاء غادي يجازيك في الظاهر. ومنين تصليوا، ما كاين علاش تكرروا الكلام الخاوي والفارغ اللي ما فيه فايدة. لأن الوثنين اللي كيعبودوا الأصنام، كيظنوا انه بكثرة الكلام غادي يستجاب ليهم. ما تكونوش بحالهم، لأن الله ابوكم اللي في السماء كيعرف اش كتحتاجوا قبل ما تطلبوه”. (متى 6: 5 – 8).

كما قلنا عزيزي المستمع في بداية هذا التأمل، المسيحيين في العالم اليوم كيصليوا في الدنيا كلها من اجل الملوك والرؤساء وقادة العالم. كيصلوا من اجل السلام ومن اجل حرية العبادة. وراهم خصصوا اليوم باش يصليوا من اجل ما هو صالح للبشرية كلها. المسيحيين اليوم كيصليوا، ولكن اشنو هي الصلاة اللي كنتكلموا عليها؟ اشنو هي الصلاة حسب المفهوم المسيحي؟ بالنسبة لكل مومن مسيحي حقيقي الصلاة هي عماد النمو الروحي في الحياة المسيحية، لأنها كتنبع من قلب المومن، وهي اللي كتعطي للمومن القوة والانتصار على المحن والمشاكل، وهي اللي كتعطيه الثقة في النفس. الصلاة المسيحية عزيزي المستمع، راها عبارة على شركة وعلاقة مثينة مع الله، وهي اللي كتربط الانسان باللي خلقه. ولكن عالمنا راه عامر باللي ما كيآمنوا شي بقوة الصلاة، عامر باللي ما كيعرفوا شي قوتها كما عرفها المسيح. يسوع كان ديما في علاقة مع الله بواسط الصلاة. على داك الشي قرينا في بداية هذا التأمل، أنه طلع للجبل باش يصلي لأبوه اللي في السماء باش يقوده لأتخاد القرار الصائب، وبعد ما قضى الليلة كلها في الصلاة، قدر يختار تلاميذ أوفياء، اختار رسل متحمسين لنشر الرسالة المسيحية.

الصلاة عزيزي المستمع راها مهمة، حيث هي صلة الوصل بين الله والانسان، بل هي حديث بين الابن وابوه. فاحنا المومنين كنتسماوا ابناء الله، لأننا كنثيقوا فيه وكنآمكنوا به. كاين اللي كيصلي بلا إيمان، وما مقتانعش. وشي ناس كيصليوا غير بسبب الروتين. اللشي الي كيجعلنا مهزومين ومغلوبين قدام الشيطان، هو عدم الصلاة. على داك الشي طلب منا المسيح نكونوا مومنين، وبغى إيماننا يكون قوي، حيث قال: “إذا كان عندكم الأيمان وما تشكوش، كل ما تطلبوه في الصلاة بالأيمان تنالونه”. كلام المسيح هذا يعني ان نمو حياتنا الروحي كيتعلق بألأيمان في الله وفي كلامه في الكتاب المقدس.

اليوم عزيزي المستمع هو يوم الصلاة العالمي، واش غادي تنظم لخوتك وتصلي معهم من اجل بلادك ومن اجل حكام وطنك. وصلي من اجل السلام باش يعم أرضنا. وسلام الله الروحي يعمر قلوبنا باش نكونوا في شركة معه. انتهى تأمل اليوم ونتلاقاوا غدا انشاء الله في تأمل آخر من انجيل لوقا. دمت في رعاية اله السلام. الى اللقاء.