التأمل اليومي – الأحد 7-2-2010
الموضوع: الخمر والمسكر

فرحان نتلاقا بيك مرة اخرى عزيزي المستمع في تأمل جديد من انجيل لوقا. اليوم غادين نرجعوا للفصل الأول من الأنجيل باش نقراوا ما يلي: اسمع… “كان واحد الكاهِن (يعني فقيه في الديانة اليهودية) كيتسمى زَكَرِيَّا، وأمراته تتسمى أَلـِـيصَابَاتُ. كانوا بزوجهم ابرار وكيتقوا الله، وكيتمشاوا في طريقه بلا لوم. ولكن ما كان عندهم اولاد، لأن أَلـِـيصَابَاتُ كانت أمراة عاقرة وكبيرة في العمر هي وزكريا. وحين كان زكريا داخل الهيكل (داخل الجامع) باش يقدم البخور. ظَهَرَ لَيهُ مَلاَكٌ مِنْ عِنْدِ الله. زكريا اضطرب وخاف حين شاف جبريل. ولكن الملاك قال ليه ما تخافش، لأن صلاتك والدعاء ديالك استجاب ليهم الله. على داك الشي أمراتك ألــيـصـابات  غادية تحمل وتولد ليك ولد، وانت عليك تسميه يوحنا. غادي تفرح وتبتهج بيه، وبزاف الناس غاديين يفرحوا بالولادة دياله. وراه غادي يكون عظيم قدام الله، وما يشرب لا خمر ولا مسـكـر، لأنه من بطن امه غادي يعمر بالروح القدس. ويـرجع بزاف الناس للرب إلههم” (لوقا 1: 5 – 10).

واش لاحظت عزيزي المستمع اش قال جبريل لزكريا على يوحنا؟ قال ليه: “ما غاديش يشرب لا  خمر ولا  مسكر”. واحنا في في هذا التأمل بغينا نتكلموا شوية على الخمر والمسكر باش نعرفوا اشنو هو الفرق بينهم، وباش نعرفوا واش شريب الخمر ممنوع او مسموح بيه في المسيحية. اذا رجعنا للعهد القديم من الكتاب المقدس، يمكن لينا نوجدوا 11 كلمة عبرية تدل على الخمر، وما شي ساهل نميزوا بين هذه الكلمات وبين نوع الخمر اللي كيشيروا ليه، لأنهم كيتشابهوا. ولكن كاين زوج كلمات مذكورين بزاف المرات. هذه زوج الكلمات هما يـايـيـن وتـيـروش. كلمة يـايـيـن كتوصف كل انواع الخمر (نحميا 5: 18) اللي كان معصور من العنب الطازج (فريش). هذا النوع كان شراب كثيف ومركز وقوي. هذا النوع ديال الخمر كان محرم وممنوع لأنه كيجعل الأنسان يفقد توازنه وصوابه. هذا بالنسبة لكلمة يـايين. اما بالنسبة لكلمة تـيـروش، فكتشير الى عصير العنب المخمر.

اما في الأنجيل في العهد الجديد فكنوجدوا كلمة يونانية كتعبر على الخمر. هذه الكلمة هي أويــنـوس. وكتشير الى الخمر الممزوج. اللي كانوا كيشربوه بلا ما يتخلط بالماء، لأنهم كانوا كيعتقدوا باين الخمر اللي مخلط بالماء مغشوش.

الخمر الممزوج كان هو الخمر اللي زادوا فيه أنواع مختلفة ديال العشوب والعطرية باش المفعول دياله يكون قوي. وكان هناك ايضا نوع آخر من الخمر الممزوج بأعشاب مرة (وحارة) وكانوا كيستعملوه هذا النوع في التخدير والبنج (مرقس 23:15). وكانوا كيظنوا باين الخمر اذا كان تشرب وحده يضر الأنسان. على داك الشي كان عليهم يخففوا منه بالماء، باش ما يدوخش أو باش ما يجعلش الأنسان يفقد صوابه. هذا الخمر هو اللي شرب منه المسيح في العشاء الأخير مع تلاميذه. وهذا الخمر هو اللي نصح به بولس تلميذه ثيموتاوس حين قال ليه: “اشرب شوي ديال الخمر من اجل معدتك المريضة”. هذا يعني ان الخمر اللي كان مخلط بالماء كانوا يستخدموه مثل الدوى لعلاج الأمراض. واستعملوه أيضا باش ينظفوا الجراح وينقوها من المكروبات، كما عمل السامري الصالح للـشخص اللي كان مجروح، حيث نقراوا عليه ما يلي: “جاء عند المجروح ودهن جروحه بالزيت والخمر وربطهم (لو 34:10). ولكن المشكلة هي ان اليهود أساؤوا استخدام الخمر، وبالغوا في شربه. على داك الشي وبخهم الله عدة مرات، ونهاهم عليه، ونقراوا ما يلي: “الْخَمْر يتهكم، وَالْـمـسكر كيصيح بالغوات، وأللي يُدْمِنْ عَلى الخمر ما هو شي حكيم. اشكون اللي كيعاني الإضطرابات؟ ولِمَنِ الْوَيْلُ وَالشَّقَاءُ وَالُخَصام؟ واشكون اللي يتحاكم امام القضاة؟ واشكون اللي كيتجرح بلا سبب؟ واشكون اللي عينيه ديما حمرين؟ طبعا للي مدمن على الْخَمْرَ، واللـي يفتش على المسكر. ما تشوفش في الْخَمْرِ إذا صار أحمر وكيبرق في الكاس” (أم 1:20 ، 29:23 – 35، 5:31 ، إش 22:5 ، 1:28 – 7 ، 12:56 ، هوشع 11:4 ).  نفهموا من كلام الله هذا، ان الخمر راه كيدير المصايب، واحسن للأنسان يبعد عليهه. لأنه كيسلب العقول وكيسبب المشاكل اللي ما عندها حدود. على داك الشي قال جبريل لزكريا، ان يوحنا المعمدان، “ما غاديش يشرب الخمر أو المسكر، لأنه غادي يعمر بالروح القدس من بطن امه.

وختام الكلام عزيزي المستمع على الخمر، هو نطبقوا وصية بولس في الأنجيل، حيث قال: “ما تسكروش بالخمر، لأن الخمركيخرب وكيفسد الأنسان، لكن عمروا بالروح القدس” (افسس 5: 18). نودعك ألآن عزيزي المستمع على أمل اللقاء بيك غدا اشاء الله اذا بقينا بالحياة… الى اللقاء.