التأمل اليومي – الإثنين 8-2-2010
الموضوع: معمودية المسيح واستشهاد يوحنا

اهلا بك عزيزي المستمع في تأمل اليوم. في تأمل سابق تأملنا في ولادة يوحنا،  وشفنا كيف ملاك الله جبريل ظهر لأبوه زكريا وبشره بولادة يوحنا، وشفنا كيف تولد يوحنا وكبر، وكيف عاش في الخلا، وكيف كان كيعمد الناس ويطلب منهم يتوبوا. واليوم عزيزي المستمع غادين نقراوا زوج آيات من انجيل لوقا على معمودية المسيح. اسمع لهذا زوج الآيات اش كيقول:”ومنين تعمدوا الناس كلهم، تعمد المسيح حتى هو. ومنين خرج من الماء بدأ كيصلي. وفي الوقت اللي كان كيصلي فيه، تفتحت السماء، ونزل عليه الروح القدس في شكل حمامة. والناس كلهم سمعوا واحد الصوت من السما كيقول: انت ابني المحبوب اللي فرحت به” (لوقا 3: 21- 22).

هنا عزيزي المستمع نشوفوا المسيح يتاقبل مع يوحنا المعمدان أول مرة. جاء عنده باش حتى هو يتعمد. وبالفعل غطس المسيح في الماء وتعمد بالروح القدس اللي نزل عليه مثل حمامة. ولكن قبل ماعمده يوحنا، دار شي كلام بيناتهم. هذا الكلام راه موجود في انجيل متى، اللي يقول: “جاء المسيح من منطقة الجليل الى واد الأردن باش يعمده يوحنا، ولكن يوحنا حاول يمنعه وقال ليه: “نا محتاج ليك انت تعمدني، وجاي عندي نعمدك؟”. لكن المسيح جاوب يوحنا وقال ليه: “اسمح ليا نتعمد ألآن، حيث خصني نكمل كل شي كما يبغي الله”. يوحنا وافق وعمده بالغطيس في الماء. وحين تعمد المسيح وخرج من الماء، تفتحت السماء، ونزل عليه الروح القدس في هيئة حمامة. وخرج صوت من السماء يقول: “هذا هو ابني الحبيب اللي كيفرحني”. (مت 3: 13 – 17). يوحنا شهد قدام الناس كلهم وقال على المسيح: “أنا ما كنتش كنعرفه، لكن الله اللي ارسلني باش نعمد بالماء، قال ليا اللي تشوف الروح القدس نازل عليه مثل حمامة، را هذاك هو اللي غادي يعمد الناس بالروح القدس. ها انا شفته، وكنشهد باين هذا هو ابن الله” (يو 1: 31- 34).

عزيزي المستمع، واش كتعرف باين خدمة يوحنا ورسالته الأساسية انتهت بمعمودية المسيح؟ نعم، خدمة يوحنا الأساسية انتهت، لأن ملك الملوك اللي جاء يوحنا باش يوجد ليه الطريق راه وصل. الرسالة الأساسية ديال يوحنا انتهت، ولكن يوحنا وتلاميذه بقاوا كيعمدوا اللي كيجي عندهم، وخى المسيح بدأ عمله (لو 3: 23، 4: 1). وزاد يوحنا كيشهد للمسيح ويقول: “هذا هو حمل الله اللي غادي يمحي خطايا العالم” (هذا هو خروف الله اللي غادي يتحمل ذنوب البشر) (يو 1: 29 و36). وكنقراوا في انجيل متى انه بعد قليل، وصلت خدمة يوحنا لغايتها وهدفها، وانتهت بإستشهاده. والسبب هو لانه وبخ هيروس، اللي كان ملك على فلسطين في داك الوقت. يوحنا وبخ الملك لأنه أخذ هيروديا، امرأة أخوه فيلبس وتزوجها. يوحنا وبخ هيرودس ايضا على الشر والفساد اللي كان كيعمل للأمة في ارض فلسطين (مت 10: 32، لو 7: 19-23).

يوحنا المعمدان عزيزي المستمع مات شهيد باش يوصل رسالته، وبالفعل، ما استشهد حتى كمل رسالته بمجيء المسيح. وانت عزيزي المستمع، واش عندك شي رسالة خصك توصلها؟ واش انت أمين في توصيل رسالتك حتى النهاية؟ الآن غادين ننهيوا هذا التأمل اللي دار على معمودية المسيح واستشهاد يوحنا. وغدا انشاء الله نتلاقاوا باش نتأملوا في موضوع آخر من انجيل لوقا. دمت في حفظ الله ورعايته. والرب يباركك بواسطة هذا التأمل. الى اللقاء.